3 муштзани тоҷик ба даври ниманиҳоии Қаҳрамонии Осиё миёни наврасону ҷавонон дар Остона роҳ ёфтанд

Қаҳрамонии Осиё оид ба бокс миёни наврасону ҷавонон дар шаҳри Остонаи Қазоқистон ҷараён дорад. 3 муштзани тоҷик миёни наврасон - Ҷаҳонгир Камолов (-46кг), Мансурхуҷа Муминов (-48кг) ва Билолҷон Иксанов (-50кг) бо мағлуб кардани рақибон ба даври ниманиҳоӣ баромаданд.

Ёдовар мешавем, ки аз 23-юми октябр дар шаҳри Остонаи Қазоқистон Қаҳрамонии Осиё оид ба бокс миёни наврасону ҷавонон оғоз гардида, то 3-юми ноябр идома мекунад.

Тибқи иттилои Ассотсиатсияи бокси Осиё, дар чемпионат миёни наврасон 220 варзишгар (147 писар, 73 духтар) ва миёни ҷавонон 215 варзишгар (137 писар, 78 духтар) ширкат доранд. Аз ҷумла, дастаҳои мунтахаби наврасону ҷавонони Тоҷикистон оид ба бокс дар ҳайати 24 нафар (13 нафар наврас, 11 нафар ҷавон) ба Қазоқистон сафарбар гардидаанд.

Дар асоси нақша 23-29-уми октябр рақобатҳои муқаддамотӣ, 30-31-уми октябр муҳорибаҳои нимфинал ва 2-3-юми ноябр финал баргузор хоҳад шуд.