«Арсенал» ба як тир ду нишон зад

Дар бозии финали Ҷоми Англия дастаи «Арсенал» бар тими «Челси» ғолиб омад. Вохӯрии дастаҳо дар майдони муҳташами «Уэмбли» сурат гирифта, бо натиҷаи 2:1 ба суди “тӯфангдорон” хотима ёфт. Ҳанӯз дар дақиқаи 5-уми бозӣ ҳамлавари амрикоии “ашрофзодаҳо” Кристиан Пулишич дарвозаи «Арсенал»-ро рахна кард. Дар идомаи рақобат форварди габонии «Арсенал» Пйер-Эмерик Обамеянг дарвозаи рақибро ду маротиба ба нишон гирифта, ҳисобро 2:1 кард. Ҳамин тавр дастаи «Арсенал» ҳам Ҷоми Англияро ба даст овард ва ҳам роҳхати бозиҳои Лигаи Аврупоро. Дар умум “тӯфангдорон” маротибаи 14-ум ин ҷоизаро болои сар бардоштанд. Даста қаблан дар солҳои 1929/1930, 1935/1936, 1949/1950, 1970/1971, 1978/1979, 1992/1993, 1997/1998, 2001/2002, 2002/2003, 2004/2005, 2013/2014, 2014/2015 ва 2016/2017 ин ҷомро ба даст оварда буд.