Дебюти Роберт Левандовски дар MLS ба таъхир афтод

Бозии даври навбатии Лигаи футболи ИМА (MLS) миёни дастаҳои «Чикаго Файр» ва «Ванкувер Уайткэпс», ки мебоист шаби 17-уми июл баргузор мешуд, ба далели ифлосшавии шадиди ҳаво мавқуф гузошта шуд. Дар ин бора хадамоти матбуотии бошгоҳи «Чикаго Файр» хабар дод.

Тибқи иттилои нашрияи The Athletic, сабаби ба таъхир афтодани бозӣ дуди сӯхторҳои ҷангал дар Канада будааст. Дар натиҷаи паҳн шудани дуд ва бад шудани сифати ҳаво, мақомоти шаҳри Чикаго маҷбур шуданд як қатор ҷойҳои ҷамъиятиро баста, инчунин баргузории чорабиниҳои берунаро бекор намоянд.

Акнун ин бозӣ рӯзи 6-уми октябр баргузор хоҳад шуд.

Ин вохӯрӣ мебоист аввалин бозии расмии Роберт Левандовски дар MLS бошад. Ҳамлагари маъруфи лаҳистонӣ баъд аз анҷоми муҳлати шартномааш бо «Барселона» ба ҳайати «Чикаго Файр» ҳамроҳ шуд.

Ҷолиб он аст, ки дар ҳайати «Ванкувер Уайткэпс» ҳамдастаи собиқи Левандовски дар «Бавария» — Томас Мюллер ҳунарнамоӣ мекунад. Аз ин рӯ, мухлисони футбол бояд барои дидани нахустин рақобати ин ду ситораи собиқи бошгоҳи шаҳри Мюнхен каме бештар мунтазир шаванд.