Фаворис Музрапов аз идомаи Бозиҳои олимпии Париж-2024 бенасиб монд

Дар рӯзи ҳаштуми Бозиҳои тобистонаи олимпии Париж-2024 кишвари маҳбуби мо Тоҷикистонро Фаворис Музрапов намояндагӣ кард. Фаворис тариқи квота роҳхати Бозиҳои олимпиро соҳиб шуда, ягона намояндаи Тоҷикистон дар варзиши сабук буд.

Фаворис Музрапови 25 сола дар дав ба масофаи 100 метр дар гурӯҳи худ бо нишондоди 10.60 сония ба хати марра сеюм шуда расид ва ба даври баъдии Бозиҳои олимпии Париж-2024 роҳ наёфт. Давандаи Албания Франко Буррай ҳам бо натиҷаи 10.60 сония ба хати марра расид лек ӯ пештар аз Фаворис пояшро ба хати марра гузошт ва ба даври дуюм рафт.

Дар гурӯҳи мазкур намояндаи Мавритания Гарри Ноа Ҷеррел Бибии 23 сола бо нишондоди 10.27 сония аввалин шуда, ба марра расид ва ба даври дигар баромад.

Ҳамин тавр, барои Фаворис Музрапов Бозиҳои олимпии Париж-2024 бидуни натиҷа анҷом ёфт.

Тоҷикистон ҳоло дар Бозиҳои олимпии Париж -2024 ду медали биринҷӣ дорад. Нишони якуми биринҷиро дар рӯзи чаҳоруми Бозиҳои олимпӣ Сомон Маҳмадбеков зери вазни то 81 кг ва нишони дуюми биринҷиро дар рӯзи ҳафтум Темур Раҳимов зери вазни ҷамъи 100 кг ба даст оварда буд.