Голи Месси ба “Интер Майами” ғалаба овард!

Бозии даври дуюми марҳилаи гурӯҳии Ҷоми ҷаҳонии бошгоҳҳо-2025 миёни дастаҳои “Интер Майами”-и Амрико ва “Порту”-и Португалия ба анҷом расид. Вохӯрии дастаҳо дар варзишгоҳи “Мерседес Бенс”-и шаҳри Атланта дар ҳузури 31 783 нафар мухлис баргузор шуда, бо ҳисоби 2 бар 1 ба суди “Интер Майами” хотима ёфт.

Ҳисоб дар дақиқаи 8-уми бозӣ аз зарбаи пеналтӣ аз ҷониби Саму Омородин ба фоидаи “Порту” кушода шуд. Дар дақиқаи 47-ум Теласко Сеговия аз ҳайати “Интер Майами” ҳисобро баробар намуд. Месси дар дақиқаи 54-ум бо голи зебоаш аз зарбаи ҷаримавӣ голи ғалабаовари “Интер Майами”-ро ба самар расонид.

Дар даври аввал “Интер Майами” бо “Ал-Аҳлӣ” ва “Порту” бо “Палмейрас” мусовии бидуни гол бозӣ карда буданд.

Дар даври охири марҳилаи гурӯҳӣ “Интер Майами” рӯзи 24-уми июн бо “Палмейрас” ва “Порту” бо “Ал-Аҳлӣ” бозӣ мекунанд.

Ҳоло дар гурӯҳи “А” дастаи “Палмейрас” бо касби 4 имтиёз ва таносуби тӯбҳо дар зинаи аввал аст. “Интер Майами” бо 4 имтиёз дар зинаи дуюм мавқеъ гирифтааст. “Порту” ва “Ал-Аҳлӣ” бо як имтиёзӣ дар зинаҳои сеюм ва чаҳорум мебошанд.

Ёдовар мешавем, ки Ҷоми ҷаҳонии бошгоҳҳо аз 15-уми июн то 13-уми июли соли 2025 дар ИМА баргузор мешавад. Дар ин мусобиқа 32 даста ширкат доранд ва ба 8 гурӯҳ, 4 - дастаи тақсим шудаанд. Аз ҳар гурӯҳ, 2 дастаи беҳтарин ба марҳилаи плей-офф роҳ меёбанд.