Испания аввалин шуда, роҳашро ба финали Евро -2024 ҳамвор кард

Бозии даври нимниҳоии Чемпионати Аврупо -2024 миёни мунтахабҳои Испания ва Фаронса ба анҷом расид. Вохӯрии дастаҳо дар варзишгоҳи “Алянтс Арена”-и шаҳри Мюнхен дар ҳузури 62 042 нафар мухлис баргузор гардида, бо ҳисоби 2 бар 1 ба фоидаи Испания анҷом ёфт.

Ҳисобро дар дақиқаи 9-уми вохӯрӣ Коло –Муани аз ирсоли головари Мбаппе боз кард. Рандал Коло-Муани муаллифи аввалин голи Фаронсаро дар бозӣ дар Евро-2024 шуд. Қаблан, Мбаппе аз ҳайати Фаронса ба дарвозаи Полша аз пеналти дар марҳилаи гурӯҳӣ гол зада буд.

Дар дақиқаи 21-уми бозӣ Ламин Ямал бо зарбаи зебои худ ҳисобро баробар намуд. Бо ин гол Ламин Ямал ҷавонтарин муаллифи гол дар мусобиқаҳои Евро шуд. Қаблан, Ямал ҷавонтарин бозигар дар мусобиқаҳои Евро шуда буд, ки ирсоли головар анҷом додааст.

Дар дақиқаи 25-уми бозӣ Дани Олмо ҳисобро дуболо кард. Ин голи сеюми Олмо дар мусобиқаи Евро -2024 буд. Бо ин ғалаба Испания ба финали Евро -2024 баромад ва бо ғолиби ҷуфти Англия ва Нидерланд бозӣ мекунад.