Лоиқ аз Ребетски мағлуб шуд

Размикори тоҷик Лоиқ Раҷабов дар ташкилоти бонуфузи UFC қувваозмоии дуюми худро бар зидди размикори лаҳистонӣ - Матеуш Ребетски баргузор кард. Сабқати размикорон шаби гузашта, дар UFC on ABC 5 дар Ҷексонвилли ИМА баргузор шуд.

Лоиқ Раҷабов натавонист дуюмин рақобаташро дар UFC бо пирӯзӣ анҷом диҳад. Ӯ дар рақобати шаби гузашта аз рақиби лаҳистонияш Матеуш Ребетски шикаст хӯрд. Рақобат ду давр идома карда, Раҷабов бо усули нокаут мағлуб шуд.

Рақиби Лоиқ – Ребетски бо ин ғалаба шумораи пирӯзиҳояшро ба 18 расонида, 1 мағлубият бо нокаут дорад. Худи Лоиқ Раҷабов бошад, дар ҳоли ҳозир 17 ғалаба, 5 бохт ва як мусовӣ дорад.

Лоиқ Раҷабов, размикори маъруфи тоҷик, ки дар набарди аввалаш дар UFC (Ultimate Fighting Championship) пирӯз шуда, ҳамчунин дар доираи мусобиқоти ин ташкилоти варзишӣ рекорд гузошт. Ӯ 11 партоби муваффақ (тейкдаун) анҷом дода буд.