Мунтахаби наврасони Тоҷикистон (U-17) муқобили Кореяи Ҷанубӣ бо либоси сурх бозӣ мекунад

Дастаи мунтахаби наврасони то 17-солаи Тоҷикистон дар даври чорякниҳоии Ҷоми Осиё-2025 муқобили тими Кореяи Ҷанубӣ бо либоси сурх бозӣ мекунад.

Шуруъ карда аз марҳилаи чорякниҳоӣ дар тамоми бозиҳои Ҷоми Осиё-2025 (U-17) системаи VAR истифода мешавад.

Тибқи низомномаи мусобиқот, агар вақти асосии бозӣ мусовӣ шавад, баъди он силсилаи пеналти таъйин мегардад.

Ин дидор имрӯз, 14 апрел дар варзишгоҳи «Шоҳзода Абдуллоҳ Ал-Файсал Спортс Сити»-и шаҳри Ҷидда баргузор шуда, соати 20:15 ба вақти маҳаллӣ (соати 22:15 ба вақти Душанбе) оғоз мешавад.

Ёдовар мешавем, ки дастаи мо дар даври ниҳоии марҳилаи гурӯҳии Ҷоми Осиё-2025 дар гурӯҳи «D» бар тими Эрон бо ҳисоби 3 бар 1 ғалаба кард. Ин ғалаба ба тими Тоҷикистон имкон дод, ки дар гурӯҳ мақоми аввалро ишғол карда, роҳхати Ҷоми ҷаҳон-2025-ро, ки моҳи ноябр дар Қатар баргузор мешавад, ба даст орад.

Бо гузаро шудани 7 сол дастаи Тоҷикистон роҳи худро ба Ҷоми Ҷаҳон ҳамвор намуд. Ба ин тартиб, мунтахаби наврасони Тоҷикистон (U-17) бори сеюм дар таърихи худ ба қисми ниҳоии мусобиқоти қаҳрамонии ҷаҳон роҳ ёфт. Қаблан наврасони мо дар чемпионатҳои ҷаҳон дар Кореяи Ҷанубӣ (2007) ва Бразилия (2019) ширкат карда буданд.

ТВ "Варзиш"