Натиҷаи самбочиёни тоҷик дар рӯзи якуми Чемпионати ҷаҳон

Рақобатҳо дар доираи рӯзи якуми Чемпионати ҷаҳон оид ба самбо баргузор шуданд. Имрӯз сабқатҳо дар вазнҳои 48, 60, 72 кг миёни бонувон 52, 68, 90 кг миёни мардон ва 57, 74, 100 кг дар самбои размӣ доир шуданд. Дар вазни 57 кг дар самбои размӣ Тоҷикистонро Ҷамшед Умаров намояндагӣ кард. Ҷамшед дар даври аввал озод буд. Дар даври дуюм ӯ бо намояндаи Россия - Александр Нестеров вохӯрӣ карда, шикаст хӯрд. Дар вазни 68 кило дар самбои варзишӣ варзишгари тоҷик - Парвиз Додов ба майдон баромад. Ӯ низ рақобатро аз даври дуюм шуруъ карда, дар ин марҳила аз варзишгари рус - Михаил Воробев мағлуб гарлид. Намояндаи дигари самбои тоҷик - Зафар Олимшоев дар вазни 90 кг ҳунарнамоӣ кард. Ӯ дар даври якум бар варзишгари кишвари Австрия - Вен Клинтон дастболо шуд. Дар даври дуюм бо Григор Сахакяни армениягӣ неру санҷида, ӯро низ мағлуб сохт. Рақиби навбатии Зафар самбочӣ аз Нидерландия - Мистрал Ҷенсен ба ҳисоб мерафт. Олмшоев тавонист, ки ин ҳарифашро низ сарафканда созад. Зафар дар даври чорум шикаст хурда, пасон рақобатро дар даври тасаллобахш идома дод. Дар даври   тасаллобахш низ Зафар дучори бохт шуда, зинаи панҷумро ишғол кард. Ёдовар мешавем, ки дар чемпионати ҷаҳон оид ба самбо мунтахаби кишвар дар ҳайати 9 нафар таҳти роҳбарии сармурабӣ - Бозор Носиров ҳунарнамоӣ доранд.