Полша бори сеюм қаҳрамони Лигаи миллатҳо оид ба волейбол шуд

Дастаи мунтахаби мардонаи Полша унвони қаҳрамонии Лигаи миллатҳо оид ба волейболро дар соли 2026 ҳифз карда, дар финал мунтахаби Иёлоти Муттаҳидаи Амрикоро бо ҳисоби 3:2 (25:21, 23:25, 25:27, 25:23, 15:10) шикаст дод. Вохӯрии ниҳоӣ дар Чин баргузор гардид.

Волейболбозони Полша дар ҷараёни бозӣ бо ҳисоби 1:2 аз рӯи сетҳо қафо мемонданд, аммо тавонистанд вазъиятро ба нафъи худ тағйир дода, ғалабаи иродавӣ ба даст оранд ва унвони қаҳрамониро ҳифз кунанд.

Дар ҳайати қаҳрамонон Камил Семенюк беҳтарин бозигар буд. Ӯ 17 имтиёз ба даст оварда, аз 23 ҳамла 13-тоашро бомуваффақият анҷом дод (57%), се блоки натиҷабахш, як эйс ва 55 дарсади қабули муваффақро сабт кард.

Аз ҷониби мунтахаби ИМА Ҷейк Ҳейнс бо 21 имтиёз беҳтарин нишонзан гардид. Ӯ аз 33 ҳамла 18-тоашро самаранок истифода бурда (55%), инчунин се эйс анҷом дод.

Ин сеюмин унвони қаҳрамонии Полша дар таърихи Лигаи миллатҳо мебошад. Пеш аз ин онҳо солҳои 2023 ва 2025 низ ғолиби мусобиқа шуда буданд. Бо ин пирӯзӣ Полша ба муваффақтарин тими мардона дар таърихи Лигаи миллатҳо табдил ёфт.

Пеш аз ин мунтахабҳои Фаронса ва Русия ҳар кадом ду маротиба соҳиби ин унвон шуда буданд, аммо ҳоло Полша бо се қаҳрамонӣ ягона пешсафи таърихии мусобиқа ба ҳисоб меравад.

Лигаи миллатҳои волейбол аз соли 2018 баргузор шуда, ҷойгузини Лигаи ҷаҳонии мардон гардид. Дар финали соли гузашта низ Полша Италияро бо ҳисоби 3:0 (25:22, 25:19, 25:14) мағлуб карда буд.

Ёдовар мешавем, ки дар бахши занон мунтахаби Туркия қаҳрамони Лигаи миллатҳои соли 2026 гардида буд.