Шеров барандаи нишони биринҷии Қаҳрамонии ҷудои ҷаҳон миёни ҷавонон гардид

Ҷудокори ҷавону умедбахши тоҷик Абубакр Шеров зери вазни то 73 кг дар рӯзи дуюми Қаҳрамонии ҷудои ҷаҳон дар Португалия ба гирифтани нишони биринҷӣ даст ёфт. Ин аввалин медали Абубакр дар мусобиқаҳои Қаҳрамонии ҷудои ҷаҳон миёни ҷавонон маҳсуб мешавад.

Абубакр дар масири расидан ба нишони биринҷии Қаҳрамонии ҷудои ҷаҳон аз садди роҳ дар даври аввал Руслан Коротичи амрикоӣ, дар даври дуюм Габриел Фалкаои бразилӣ, дар даври сеюм Гергели Адорҷании маҷориро мағлуб карда, дар даври чаҳорякниҳоӣ аз Алмат Адилети қазоқ мағлуб шуд ва ба даври тасаллобахш рафт.

Дар даври тасаллобахш Абубакр бо Элиот Преве аз Фаронса зафар ёфта, дар мубориза барои нишони биринҷӣ бар Кейто Киҳараи ҷопонӣ музаффарият ба даст овард ва нишони биринҷии мусобиқаро соҳиб шуд.

Ғолибони вазни -73 кг

1.Вусал Галандарзода (Озарбойҷон)

2.Ҷак Ёнезука (Амрико)

3.Абубакр Шеров (Тоҷикистон)

3.Муҳаммад Газалоев (Белгия)

Дар ин рӯзи мусобиқа ҷудокори дигари тоҷик Муҳиддин Асадуллоев дар вазни то 73 кг баромад карда, то ба даври ҳаштякниҳоӣ расид. Дар даври аввал Муҳиддин бар Абдулло Алиеви қирғиз, дар даври дуюм Рикардо Гуерраи мексикоӣ ғалаба карда, дар даври сеюм аз Ҷак Ёнезукаи амрикоӣ ноком шуд.

Ёдовар мешавем, ки дар рӯзи якуми мусобиқа ҷудокорои тоҷик Фазлиддин Садриддинзода дар вазни то 66 кг баромад карда, дар даври аввал бо 2 имтиёзи вазарӣ аз Энхтур Ҷугдергарави муғул шикаст хӯрда буд.