Ситораи «Барселона» ҳангоми тамрин дар тими миллии Испания осеб бардошт

Сармураббии «Барселона» Ханси Флик дар чанд бозии оянда ба нимҳимоятгари марказии худ Фермин Лопес такя карда наметавонад.

Ба иттилои сомонаи расмии Барселона, Фермин ҳангоми тамрин бо тими милли то 21-солаҳои Испания аз мушакаш осеб гирифтааст.

Мӯҳлати дақиқи барқарор шудани футболбоз расман эълон нашудааст. Аммо, тавре ки Тони Хуанмарти хабар медиҳад, шояд,ки футболбоз 3-4 ҳафта натавонад ба майдон барояд.

Эҳтимол меравад, ки Фермин дар бозиҳои “Ла-Лига” бо «Жирона», «Вилярреал», «Хетафе» ва «Осасуна», инчунин дар  бозии  Лигаи Чемпионҳо бо «Монако» иштирок накунад.

Ба ҷои Фермин Лопес, нимҳимоятгар Пабло Торре ба тими милли то 21-солаҳои Испания даъват шуд.

Ёдовар мешавем, ки Фермин Лопес беҳтарин футболбози бозиҳои олимпии Париж-2024 гардид,ки он ҷо  Испания қаҳрамони бозиҳои олимпӣ гардида буд. Дар ин мусобиқа  дар 6 бозӣ 2 гол ва 6 партофти головар анҷом додааст.