Собиқ мураббиҳои “Реал Мадрид” дар дербии Лондон ба ҳам меоянд

Сармураббии “Челси” Хаби Алонсо ва сармураббии “Фулҳэм” Алваро Арбелоа мавсими аввали Премйер-лигаи худро бо бозӣ бо ҳамдигар оғоз мекунанд.

Дастаи “Фулҳэм” расман эълон кард, ки Алваро Арбелоа ба ҳайси сармураббии нави бошгоҳи шаҳри Лондон таъйин шудааст. Мутахассиси 43-солаи испанӣ бо бошгоҳи шаҳри Лондон шартнома ба имзо расонд, ки муҳлати он то тобистони соли 2029 амал мекунад.

Арбелоа фаъолияти мураббигии худро дар Премйер-лигаи Англия аз мавсими 2026/27 оғоз хоҳад кард. Дар даври аввали чемпионат “Фулҳэм” рӯзи 24 –уми август дар майдони “Крейвен Коттеҷ” бо тими дигари шаҳри Лондон - “Челси” рӯ ба рӯ мешавад, ки чанде пеш Хаби Алонсо роҳбарии онро ба уҳда гирифтааст. Ин бозӣ барои ҳар ду мураббии испанӣ нахустин таҷрибаи онҳо дар Премйер-лига ҳамчун сармураббӣ хоҳад буд.

Арбелоа мавсими гузашта баъди рафтани Хаби Алонсо вазифаи сармураббии дастаи асосии “Реал Мадрид”-ро ба зимма гирифта буд. Пеш аз ин ӯ дар сохтори бошгоҳи шоҳона фаъолият карда, дастаҳои ҷавонони “Реал” ва инчунин “Кастиля”-ро роҳнамоӣ мекард.

Роҳбарияти “Фулҳэм” умедвор аст, ки таҷриба ва донишҳои Арбелоа ба даста барои рақобати беҳтар дар Премйер-лига ва расидан ба натиҷаҳои назаррас дар мавсими нав мусоидат хоҳанд кард.

Ёдовар мешавем, ки мавсими гузашта, "Челси" дар ҷадвали Премйер-лига дар ҷои 10-ум ва "Фулҳэм" дар ҷои 11-ум қарор гирифт.