Тими миллии футзали Тоҷикистон дар Душанбе бо дастаҳои Испания ва Нидерланд бозиҳои дӯстона анҷом медиҳад

Дастаи мунтахаби футзали Тоҷикистон таҳти роҳбарии Пайрав Воҳидов дар доираи омодагӣ ба Ҷоми ҷаҳон-2024 моҳи сентябр дар Душанбе бо тимҳои миллии Испания ва Нидерланд ду бозии дӯстона анҷом медиҳад.

Футзалбозони мо 5 сентябр бо тими миллии Испания ва 8 сентябр бо мунтахаби Нидерланд рақобат мекунанд. Ҳамчунин рӯзи 7 сентябр дар Душанбе вохӯрии дастаҳои мунтахаби Испания ва Нидерланд баргузор мешавад. Ҳар се бозии дӯстона дар маҷмааи варзишии «Кохи Олимп»-и Душанбе сурат мегиранд.

Бояд гуфт, тими миллии Тоҷикистон дар мусобиқоти қаҳрамонии ҷаҳон, ки аз 14 сентябр то 6 октябр дар Ӯзбекистон баргузор мешавад, дар гурӯҳи «Е» ҳунарнамоӣ мекунад. Ҳарифони дастаи мо яккачинҳои Марокаш (16 сентябр), Португалия (19 сентябр) ва Панама (22 сентябр) мебошанд.