Тими олимпии Тоҷикистон дар бозии дуюми дӯстона боз аз АМА шикаст хӯрд

Дар доираи ҷамъомади тамринӣ дар АМА мунтахабҳои олимпии Тоҷикистон (U-23) ва Амороти Муттаҳидаи Араб (U-23) вохӯрии дуюми дӯстонаро доир карданд. Бозии дастаҳо 18-уми ноябр дар варзишгоҳи «Эмирейтс»-и шаҳри Рас-ал-Хайма баргузор гардида, бо ҳисоби 3 бар 0 ба фоидаи тими АМА анҷом ёфт.

Қобили зикр аст, ки 15 –уми ноябр дар варзишгоҳи «Эмирейтс»-и Рас-ал-Хайма бозии дӯстонаи якумро дастаҳо доир карда буданд, ки бо ҳисоби 3:0 ба фоидаи тими Амороти Муттаҳидаи Араб анҷом ёфта буд.

Ёдовар мешавем, ки ба ҷамъомади тамринӣ дар АМА 24 бозигар аз ҳайати тими мунтахаби Тоҷикистон даъват шудааст. Чаҳор бозигар – Содиқҷон Қурбонов, Амадонӣ Камолов, Азизбек Ҳайитов ва Далер Шарифов, ки метавонанд дар ҳайати мунтахаби олимпии кишвар дар марҳилаи интихобии Ҷоми Осиё-2026 (U-23) иштирок кунанд, дар ихтиёри тими миллии Тоҷикистон мебошанд.