Венесуэлаи ҳангомаофар аз идомаи рақобатҳо дар Ҷоми ҷаҳонии футзал -2024 бенасиб монд

Дар доираи бозиҳои даври чаҳорякниҳоии Ҷоми ҷаҳонии футзал -2024 дастаҳои Украина ва Венесуэла андари майдони рақобат шуданд. Вохӯрии дастаҳо дар Маҷмааи варзишии Ҳумо Арена баргузор шуда, бо ҳисоби 9 бар 4 ба фоидаи тими миллии Украина анҷом ёфт.

Голҳоро аз ҳайати Украина Данил Абакшин (5', 16', 18'), Петро Шотурма (14'), Назар Швед (20'), Ростислав Семенченко (21'), Александр Сухов (27'), Ихор Чернавский (32') ва Микола Микйтиук (38') ба самар расониданд. Голҳои дастаи Венесуэларо Милтон Франсия (6'), Хесус Виамонте (16'), Алфредо Видал (17') ва Рафаэл Морилло (30') марбути номи хеш карданд.

Бо ин ғалаба тими милли Украина ба марҳилаи нимниҳоӣ роҳашро ҳамвор кард. Венесуэла пас аз бохт аз идомаи мусобиқа бенасиб монд. Дар даври нимниҳоӣ Украина бо Бразилия бозӣ мекунад. Вохӯрии дастаҳо рӯзи 2-юми октябр баргузор мегардад.

Тими миллии Венесуэла, ки дар як гурӯҳ бо Эрон, Фаронса ва Гватемала буд ба таври ҳангомавӣ ба даври плей-офф баромад. Футзалбозони Венесуэла дар гурӯҳи “F” бо Эрон дар бозии аввал бо ҳисоби 1 бар 7 ноком гардида, дар бозии дуюм аз Фаронса бо ҳисоби 7 бар 3 шикаст хӯрданд.

Дар бозии охири гурӯҳ Венесуэла бо ҳисоби 7 бар 3 Гватемаларо мағлуб карда, ба марҳилаи плей-офф баромад. Ҳеҷ кас гумон надошт, ки Венесуэла ба даври плей-офф роҳ меёбад. Дар бозии марҳилаи плей-офф тими Венесуэла бар қаҳрамони ду каратаи ҷаҳон Испания бо ҳисоби 2 бар 1 ғалаба карда, ҳангомаи дигарро офарид. Лек дар марҳилаи чаҳорякниҳоӣ ин даста аз Украина мағлуб шуд. 

Ёдовар мешавем, ки Португалия қаҳрамонии феълии ҷаҳон аст. Дар Ҷоми ҷаҳонии соли 2021 дар Литва дар финал Португалия бар Аргентина (2:1) зафар ёфта буд. Қазоқистон ҳамон сол дар даври нимниҳоӣ аз дасти Португалия ноком гардида буд.