Назаров Дилшод Ҷамолиддинович 6-уми майи соли 1982 дар шаҳри Душанбе ба дунё омадааст. Ӯ аз маъруфтарин варзишгарони тоҷик маҳсуб мешавад, ки дар риштаи варзиши сабук дар навъи гурзпартоӣ ба натиҷаҳои назаррас ноил гардидааст.

Фаъолияти варзишии Дилшод Назаров аз овони ҷавонӣ оғоз гардида, бо роҳбарии мураббӣ Тулабой Худабердиев аввалин қадамҳоро гузоштааст. Баъдан, Назаров бо мураббӣ Юрий Пискунов боз ҳам такмил ёфт.
Ӯ дар мусобиқаҳои байналмилалӣ Тоҷикистонро муаррифӣ карда, аввалин ва то имрӯз ягона медали тиллои олимпии кишварашро ба даст овардааст. Назаров бо натиҷаҳои баланд ва собитқадамии худ дар майдони ҷаҳонӣ ба унвони яке аз варзишгарони беҳтарини Осиё шинохта шудааст.

Дилшод Назаров иштирокчии чандин Бозиҳои олимпӣ мебошад. Қуллаи фаъолияти варзишиаш соли 2016 дар Бозиҳои олимпии Рио-де-Жанейро ба даст омад, ки дар он бо натиҷаи 78,68 метр сазовори медали тилло гардид ва номи Тоҷикистонро дар харитаи варзиши ҷаҳонӣ бо ҳарфҳои заррин сабт кард. Ин ягона медали тиллои Тоҷикистон дар Бозиҳои олимпӣ то ба имрӯз маҳсуб мешавад. Ба ин мусобиқа Назаровро мураббӣ Владимир Машка омода намуд.

Инчунин, Дилшод Назаров ноибқаҳрамони ҷаҳони соли 2015 дар Пекин, қаҳрамони 3 каратаи Бозиҳои Осиёӣ дар солҳои 2006, 2010, 2014 ва қаҳрамони 5 каратаи Осиё дар солҳои 2009, 2013, 2015, 2017, 2019 мебошад. Соли 2018 ғолиби мусобиқаи Ҷоми ҷаҳон дар Чехия шудааст. Назаров рекорди гурзандозии Осиёро бо нишондоди 80,71 метр ба номи худ сабт намуда, дар сатҳи қора чандин сол мавқеи пешсафиро нигоҳ доштааст. Ҳамчунин, Назаров аввалин варзишгари тоҷик аст, ки аз Бозиҳои Осиёӣ медали тиллоро барои Тоҷикистон соҳиб шудааст.
Пас аз анҷоми фаъолияти варзишии худ, Назаров ба корҳои маъмурӣ дар соҳаи варзиш гузашт ва барои рушди варзиш дар Тоҷикистон саҳм мегузорад.

Дилшод Назаров бо унвонҳои давлатии Ҷумҳурии Тоҷикистон, аз ҷумла Орден «Шараф» II, I солҳои 2015 , 2016 ва медали “Хизмати Шоиста” соли 2009, Устоди шоистаи варзиши Ҷумҳурии Тоҷикистон мукофотонида шуда, аз чеҳраҳои асили ифтихории варзиши миллат ба ҳисоб меравад.