Рустамова Зебинисо Сангиновна 29-уми январи соли 1955 дар шаҳри Хуҷанд ба дунё омадааст. Аз овони ҷавонӣ ба намуди варзиши камонварӣ шавқ пайдо карда, бо кӯшишу заҳматҳои пайваста ба яке аз варзишгарони сатҳи ҷаҳонӣ табдил ёфт.

Зебониссо Рустамова яке аз аввалин ва маъруфтарин варзишгарони тоҷик дар намуди камонварӣ мебошад, ки дар замони Иттиҳоди Шӯравӣ фаъолият кардааст. Ӯ бо натиҷаҳои назарраси худ дар мусобиқаҳои байналмилалӣ Тоҷикистонро ба ҷаҳониён муаррифӣ намудааст.

Қуллаи фаъолияти варзишии ӯ дар Бозиҳои олимпии Монреал-1976 ба амал омад. Рустамова дар ҳайати тими Иттиҳоди Шӯравӣ дар мусобиқаи тирандозӣ аз камон иштирок намуда, сазовори медали биринҷӣ гардид. Ин аввалин медали олимпӣ аз ҷониби як намояндаи Тоҷикистони имрӯза дар таърихи Бозиҳои олимпӣ ба ҳисоб меравад.
Илова ба ин, Рустамова дар чемпионатҳои СССР ва мусобиқаҳои байналмилалӣ натиҷаҳои баланди дигар низ ба даст оварда буд. Ӯ чандин бор қаҳрамони чемпионатҳои Иттиҳоди Шӯравӣ ва иштирокчии мусобиқаҳои бузурги байналмилалӣ буд.

Аз ҷумла, Рустамова 4 карат қаҳрамони ҷаҳон дар ҳисоби инфиродӣ ва даставӣ (Интерлакен – 1975, Сеул – 1985, Сидней - 1987), барандаи медали нуқраи Чемпионати ҷаҳон (Австралия - 1977), чемпиони секаратаи Аврупо (Копенгаген – 1976, Измир – 1985, Париж - 1986), барандаи медали нуқраи Бозиҳои “Дӯстӣ” Прага-1984, Алтернатива ба Бозиҳои тобистонаи олимпии Лос Анҷелес, чемпиони 15-каратаи ИҶШС ва 20-каратаи Тоҷикистон, рекордгузори бисёркаратаи ҷаҳон, Аврупо, ИҶШС ва Тоҷикистон, варзишгари барҷастаи Тоҷикистон дар асри 20, бо ордени “Нишони фахрӣ”, медалҳои “Барои меҳнати шоиста” ва “20-солагии Истиқлолияти Тоҷикистон” мебошад.
Баъд аз анҷоми фаъолияти варзишӣ, Зебинисо Рустамова ба кори омӯзгорӣ ва рушди варзиши камонварӣ машғул шуда, барои омода кардани насли наврас ва ҷавон дар Тоҷикистон саҳми калон гузошт. Ӯ дар таълиму тарбияи варзишгарони тоҷик саҳми муассир дорад.

Бо унвонҳои фахрии Иттиҳоди Шӯравӣ ва Тоҷикистон, аз ҷумла Устоди варзиши дараҷаи байналмилалӣ, қадрдонӣ шудааст.
Зебинисо Рустамова яке аз рамзҳои аввалин комёбиҳои варзиши тоҷик дар сатҳи байналмилалӣ ба ҳисоб меравад ва номи ӯ то имрӯз бо ифтихор зикр мегардад.