Абдусаламов Юсуф Рашидович 8 –уми ноябри соли 1977 дар шаҳри Махачқалъаи Ҷумҳурии Доғистони Федератсияи Русия таваллуд шудааст. Ӯ яке аз варзишгарони маъруф ва муваффақи тоҷик дар намуди гӯштини тарзи озод ба ҳисоб меравад. Абдусаломов пас аз шомил шудан ба тими миллии Тоҷикистон дар мусобиқаҳои байналмилалӣ кишварро муаррифӣ намуда, яке аз аввалин медалдорони олимпии Тоҷикистон гардид.

Фаъолияти варзишии худро дар Доғистон оғоз намуда, дар он ҷо маҳорати гӯштинро омӯхтааст. Бо гузашти вақт ва дар пайи интихоби намояндагии Тоҷикистон, дар сатҳи байналмилалӣ баромад намуда, ба яке аз беҳтарин гӯштигирони вазни 84 кг табдил ёфт.

Қуллаи комёбиҳои варзишии Юсуф Абдусаломов соли 2008 дар Бозиҳои олимпии Пекин ба даст омад. Ӯ дар ин мусобиқаи бузурги ҷаҳонӣ дар вазни то 84 кг сазовори медали нуқра гардид, ки аввалин медали олимпӣ дар таърихи соҳибистиқлолии Тоҷикистон ба шумор меравад. Ин дастоварди таърихӣ номи ӯро дар саҳифаҳои тиллоии варзиши тоҷик сабт намуд.
Илова бар медали олимпӣ, Абдусаломов ноибқаҳрамони ҷаҳони соли 2007 дар Боку, қаҳрамони Осиёӣ соли 2003 дар Ню-Делӣ, ҷоизадори Чемпионати Осиё дар солҳои 2008, 2012 мебошад. Дар Бозиҳои Осиёии Пусан дар соли 2002 соҳиби медали нуқра шудааст.

Пас аз анҷоми фаъолияти варзишӣ, Юсуф Абдусаломов ба омода намудани варзишгарони ҷавон машғул шуда, барои рушди гӯштини тарзи озод дар Тоҷикистон то ҳадди имкон саҳмгузор мегардад. Ӯ дар баробари фаъолияти мураббигӣ, дар сохторҳои варзишии кишвар низ замоне фаъолият кардааст.

Юсуф Абдусаломов бо мукофотҳои давлатӣ ва унвонҳои фахрӣ, аз ҷумла бо унвони Устоди варзиши дараҷаи байналмилалӣ, сарфароз гардонида шудааст ва то имрӯз ҳамчун яке аз чеҳраҳои барҷастаи варзиши тоҷик шинохта мешавад. Ҳоло мураббии Федератсияи байналмилаии гӯштини тарзи озод буда, дар Кумитаи олимпии Арабистони Саудӣ фаъолият мекунад.