Оғози Чемпионати Осиё миёни муштзанони то 22 сола дар Қазоқистон

Дирӯз, дар аввалин рӯзи рақобатҳо миёни муштазнони то 22 сола дар Чемпионати Осиё дар шаҳри Остона 6 муштзани тоҷик ҳунарнамоӣ карданд. Мусобиқаи мазкур, ҳамчун марҳилаи омодагӣ ба Чемпионати ҷаҳонии бокс маҳсуб мешавад, ки моҳҳои октябр-ноябри соли 2024 дар Хорватия баргузор мешавад.

Меҳрон Шафиев (51 кг) дар даври аввал намояндаи Тайпеи Чин - Као Тзу Ҳенгро дар раунди дуюм тариқи нокаут мағлуб кард. Хусравхон Раҳимов (57 кг) дар рақобати аввал бо ҳисоби 5:0 муқобили Гуванч Ахмедов аз Туркманистон зафар ёфт. Абубакр Муродзода (60 кг) дар нерӯсанҷии аввал бо ҳисоби 5:0 муқобили намояндаи Шри-Ланка Премаратна Ясиду дастболо гардид. Довуд Маҳкамов (71 кг) дар раунди аввал тариқи нокаут бар муштзани афғон Алӣ Майсам Ализода ғолиб шуд .

Меҳроҷиддин Баротов (48 кг) дар даври аввал аз намояндаи Баҳрайн - Мигма Дорҷи ва Меҳроҷ Зоидов (54 кг) дар даври аввал аз муштзани муғул Энхсайхан Оюн Эрдене мувоҷеҳи шикаст шуданд .

Ёдовар мешавем, ки Чемпионати Осиё оид ба бокс   аз 25-уми апрел то 8-уми май миёни муштзанони то 18 ва 22 сола байни писарону духтарон дар Қазоқистон баргузор мегардад.