Бозиҳои олимпӣ барои ҷудочиёни тоҷик хотима ёфтанд

Охирин умеди мардуми тоҷик ба Темур Раҳимов буд, ки он ҳам бебарор анҷом ёфт. Акнун чор ҷудочие, ки Тоҷикистонро дар 32-юмин Бозиҳои олимпи Токио-2020 намояндагӣ мекарданд, ҳамааш бидуни зинаҳои ифтихорӣ монданд. Дар рӯзи охирини рақобатҳои ҷудо паҳлавони гаронвазни кишвар Темур Раҳимов дар вазни +100 рӯи татамӣ баромад. Темур дар даври аввал бар ҷудочии кишвари Куба - Энди Гранда даст ба гиребон шуд. Дар ин вохӯри Темури мо бар рақибаш пирӯз шуда, ба даври 1/8 финал роҳ ёфт. Аммо дар даври мазкур Темур аз рақиби сарсахт қаҳрамони ҷаҳони соли 2018 намояндаи Гурҷистон - Гурам Тушишвили дучори бохт шуда, аз идомаи рақобатҳои Бозиҳои олимпӣ маҳрум шуд. Бояд гуфт, ки қаблан Сомон Маҳмадбеков (-73кг), Акмал Муродов (-81кг) ва Комроншоҳи Устопириён (-90кг) низ дучори бохт шуда буданд.