“Рома” ба даври нимниҳоии Лигаи Аврупо баромад!

Дастаи “Рома" ба даври ниманиҳоии Лигаи Аврупо роҳ ёфт. Дастаи шаҳри Рим дар марҳилаи чаҳорякниҳоӣ бар бошгоҳи “Милан” зафар ёфт. Вохӯрии дастаҳо дар варзишгоҳи “Олимпико”-и шаҳри Рим доир шуда, бо ҳисоби 2 бар 1 ба фоидаи мизбонон анҷом ёфт.

Ҳисобро дар вохӯрӣ мизбонон бо голи Ҷанлука Манчини дар дақиқаи 12-ум боз карданд. Бо гузаро шудани 10 дақиқа Пауло Дибала ҳисоби бозиро дуболо ба фоидаи тими шаҳри Рим кард. Дар дақиқаи 31-уми вохӯрӣ Зеки Челик аз ҳайати “Рома” корти сурх гирифт. Миланиҳо дар дақиқаи 85-ум ба задани гол даст ёфтанд. Голро Маттео Габбия ба самар расонид.

Бозии аввали дастаҳо дар шаҳри Милан бо ҳисоби 1 бар 0 ба фоидаи “Рома” анҷом ёфта буд. Аз натиҷаи бозии рафту баргашт “Рома” ба даври нимниҳоии Лигаи Аврупо роҳ ёфт ва онҷо бо “Байер”-и Леверкузен бозӣ мекунад. Бозии аввали дастаҳои рӯзи 2-юми май барпо мегардад.